කලින් වතාවේ පළ කල ඡායාරුපය මෙන් නොව මෙය ලංකාවේදීම සිදු වූවක්. ෆේස්බුකියෙන් උපුටාගත් නිසා නියම මූලාශ්‍රයනම සොයා ගැනීමට බැරි වුනා.මූලාශ්‍රය කවුරුන් හෝ දන්නවානම් මට ලබා දෙන්න.

මගේ මාතෘකාවේ වචනාර්ථය සමහර විට වැරදි වෙන්න පුළුවන්.ඒත් මේකට දරු සෙනෙහස කියනවාට වැඩ මවු සෙනෙහස කියනවාට මම කැමතියි.

කොතරම් දයාන්විත වූවත් මින් ඔවුන්ගේ දරුවනට සෞඛ්‍ය අවදානමක් ඇති කරවන දෙයක්.නමුත් මේ මවු වරුන්ගේ සිතුවිලි, මෛත්‍රිය කොපමණද?. ඊනියා සමාජ සේවක නෝනලාට වඩා මොවුන් කොතරම් ශ්‍රේෂ්ඨද? සමහර විට කිරි පැකට් එකක් ගන්න මොවුන්ගේ පවුලට වත්කමක් නැතුවා වෙන්න පුළුවන්. එහෙම පුළුවන් වුනානම් තමන්ගේ දරුවාට පමණක් මවු කිරි දේවි.

එක්සත් රාජධානියේ මවු වරු පිරිසක් ළඟදී අයිස්‌ක්‍රීම් නිෂ්පාදනයට තමන්ගේ මවු කිරි අලෙවි කිරීමට ලියා පදිංචි වුනා කියලා පුවත් පාඨක තිබුනා.ඒත් ඒ නිෂ්පාදනය තහනම් කෙරුණාලු.

පහත දැක්වෙන්නේ , ඉහත ඡායාරූපයට අපේ ඈයෝ ෆේස්බුකියේ ලබා දීපු කමෙන්ටු කිහිපයක්…….

XXXX rattaran amma kenak me ayata udawu karamuda geyak hada ganna
July 17 at 2:42pm · Like · 4 people

XXXX samahara ammala thamange daruwata kiri dennath adimadi karana kaaleka me amma dewathawiyak wage, samahara minissu gedara hadana harakath maskadeta wikunana kaaleka muwapatiyek gedara thmange kirideela hadanawa kiyana aka maha aschirayak, budusaranai,
July 17 at 2:44pm · Like · 8 people

xxxxx its a very lovely seen…. Just cant believe but its real anyway…. A real mother…..
July 17 at 2:47pm · Like · 1 person

xxxx mehama ammalath innawa apa rata e inna petisara gammana wala ……….
July 17 at 2:51pm · Like · 1 person

XXXXX samahara kiri ammala daruwanta pawa kiri nodena rataka me wage sathekuta pawa kiri dena amma kenek aththatama siyaluma ammalata hoda udaharanayak,,,,,amma ammamai,,,,,,,,,,eke katha 2k naha,,,,,,,

XXXXX මාතෘත්වය පරයා මිනිසත්කම ඉස්මතු වූ මොහොතක්!
July 17 at 7:38pm · Like · 2 people

XXXX – PISSU../.Sathaata denna oni elakiri…./ maw kiri..thiyenne manussa dharuwanta../..anika thamange dharuwaata vishabija [ GERMS ] enawaa….Elakiri naethima nam koppayakata [cup ] dhaalaa denna…..
July 18 at 3:43pm · Like · 1 person

XXXXX Devani budun lasa lowama uwam kala lowata pidum lada lowa utum lada amma……amma……amma………………
July 18 at 4:48pm · Like

–>
ලිවීම සති කිහිපයකට අත් හිටුවා තිබුනත්, පහත කියවෙන නිරීක්ෂණයත් ඒ අනුව අන්තර්ජාලය ඔස්සේ කල සොයා බැලීම් කිහිපයකට පසු දැන ගත් දේත් බොහෝ දෙනෙකුට වැදගත් විය හැකි නිසා කෙටියෙන් හෝ ඒ ගැන ලිවීමට සිතුනා. මේ දේ අලුත් දෙයක් නෙවෙයි වගේම බොහෝ දෙනා කතා කරලා ඇති.

කලින් වාරයේ පොල් තෙල් මිලයට ගැනීමට වෙළඳ සැලකට ගිය අවස්ථාවේදී එහි සිටි වෙළඳ සහායකයෙකු මා රැගෙන ගිය ප්ලාස්ටික් භාජනය පතුලේ අපද්‍රව්‍ය ඇති බව පෙන්වා දුන්නා. ඒ අනුව පැහැදිලි වන්නේ ඒ ගැන නිසි අවධානයක් නොතිබූ බව. . වෙනදා පුරුද්දටම ඒ ගැන අමතක වී ගියත් අද නැවත පොල්තෙල් ගෙන ඒමට සිදු වූ අවස්ථාවේ මා වඩාත් හොදින් භාජනය පරීක්ෂා කළා. තත්වය බරපතල බව මට පෙනී ගියේ ඒ තුලා ප්ලාස්ටික් කැබලිති පවා තිබෙනු දැකීමෙන්.

කොහොම වුනත් ඉතාම පැහැදිලියි දිගු කාලයක් පොල්තෙල් දමා තිබීම නිසා ප්ලාස්ටික් බඳුනේ බිත්තියේ විඛාදනයක් වූ බව.එසේ විඛාදනය වීමට හේතුව ප්ලාස්ටික් සංයෝග රසායනික වියෝජනයකට ලක් වීම නිසා විය යුතුයි. තවත් පැහැදිලි කරනවානම් ප්ලාස්ටික් වල තිබෙන යම් රසායනික සංයෝග පොල්තෙල් වල හෝ මිශ්‍රිත වෙනත් ද්‍රව්‍ය වල දිය වී යාම නිසා මේ තත්වය ඇති වුනා විය යුතුයි.

පොල්තෙල් , ප්ලාස්ටික් දෙවර්ගයම හයිඩ්රෝකාබන නිසා ප්ලාස්ටික් සංයෝග පොල්තෙල් වල ද්‍රවණය වීමේ හැකියාවක් තිබෙනවා වෙන්න පුළුවන්. පොල්තෙල් කියන්නේ මගේ උදාහරණය විතරයි. අපේ ආහාර වල අන්තර්ගත හයිඩ්රෝකාබන ඇතුළුව තවත් සංයෝග කොපමණ තිබෙනවාද? තෙල් වර්ග පමණක් නොව අනෙකුත් ආහාර ද්‍රව්‍ය සියල්ලම පාහේ පැහැදිලිවම කාබනිකයි(මා දන්නා එකම අකාබනික ආහාර ද්‍රව්‍යය ලුණු පමණයි).ඒ වගේම ප්ලාස්ටික් බඳුන් වල ආහාර තැන්පත් කරන්නේනම් ප්ලාස්ටික් වලින් එම ආහාර වලට වියෝජනය වන රසායනික සංයෝග බොහොමයක් විය හැකියි. මගේ උදාහරණයේදී ප්ලාස්ටික් වල පැහැදිලි භෞතික විඛාදනයක් සිදු වුනා. නමුත් පොල්තෙල් වල සම්පූර්ණයෙන් ද්‍රාව්‍ය වූ යමක් තිබුනා නම් ඒක නිරීක්ෂනය වුනේ නැහැ. එතන තමා පැහැදිලි අවදානම. අප නොදැන නොදක කොතරම් රසායන සංයෝග ප්‍රමාණයක් අපේ ආහාර වලට මේ හරහා එකතු වෙනවාද? අනිත් භයානක කාරණය තමයි අනිත් හැම දේම වගේ අපි පරිහරණය කරන ප්ලාස්ටික් නිෂ්පාදනය නියම සහතික කල ප්‍රමිතියකින් තොර වීම. ඒ කියන්නේ ප්ලාස්ටික් සංයෝග වලට අමතරව නිෂ්පාදනයේදී , විශේෂයෙන් ප්‍රතිචක්‍රීකරණයෙදී එකතු වන අමතර රසායනික ද්‍රව්‍ය එකතු වෙනවා.අපි නිතරම භාවිතා කරන ලන්ච් ශීට් සම්බන්ධයෙන් ඉහත ගැටළු සමහර විට ඊට වැඩ තීව්‍ර ලෙස පවතිනවා විය යුතුයි. මොකද උණුසුම් ආහාර එතීම ඒවා භාවිතා කරන නිසා.

 

මෙය කියවන සෞඛ්‍ය හා රසායනික විද්‍යා අංශ වල අය සිටීනම් ඔවුන්ගෙනුත් මම ඉල්ලීමක් කරනවා මේ ගැන විද්‍යාත්මක විස්තර (සංයෝග, අතුරුඵල හෝ අදාළ ඕනෑම දෙයක්).ප්‍රධානම අවදානම මේ වියෝජනය වන සංයෝග පිළිකාකාරක පවා වෙන්න පුළුවන් වීම. ඒ පිළිබඳ දැනුම ඇත්තන් මෙහිදී පැහැදිලි කිරීමක් කරනවානම් ඉතා වටිනවා.පහත දැක්වෙන ප්ලාස්ටික් වර්ග හා ඒවගේ අතුරුඵල ලැයිස්තුව මම ලබා ගත්තේ අන්තර්ජාලය හරහා (මූලාශ්‍රය : http://www.ecologycenter.org/factsheets/plastichealtheffects.html ) . එහි දැක්වෙන ප්ලාස්ටික් වර්ග කිහිපයක් ආහාර සම්බන්ධව භාවිතා නොවුනත් , ඒවායේ අතුරුඵල වල වැදගත් කම නිසාම මම ඉවත් කලේ නැහැ.

 

ප්ලාස්ටික් වර්ග	භාවිතා	සෞඛ්‍ය අවදානම
පොලිවයිනයිල් ක්ලෝරයිඩ් Polyvinyl chloride (#3PVC)	ආහාර ඇසුරුම්,රූපලාවන්‍ය ද්‍රව්‍ය, කුෂන් වර්ග, පිඟන් ගඩොල්, සූප්පු, නාන කාමර තිර,සෙල්ලම් බදු, ජල නළ , උද්‍යාන නළ, වාහන අප්හෝල්ස්ට්‍රි , සුළං පුරවන ජල තටාක	පිළිකා , විකෘති දරු උපත්,ජාන විකෘති,නිදන්ගත බ්‍රොන්කයිටිස් ,වණ,චර්ම රෝග , බිහිරි බව, දෘෂ්ටි රෝග, අජීරණ , අක්මා කාර්ය විකලතාව
තැලේට (DEHP, DINP, and others)	වයිනයිල් රෙදි , එමල්ෂන් තීන්ත, පාවහන්, මුද්‍රණ තීන්ත,සෙල්ලම් බඩු , නිෂ්පාදන ඇසුරුම්, ආහාර දවටන , වයිනයිල් බිම ඇතිරිලි,රුධිර පාරවිලයන මළු සහ වෙනත් වෛද්‍ය උපාංග.	අන්තරාසර්ග ග්‍රන්ථි අවහිරතා, ඇදුම ආශ්‍රිත තත්ත්ව, වර්ධනයට හා ප්‍රජනන හැකියාවට වන බලපෑම්, ඩයොක්සීන හා රසදිය පරිසරයට එක වීම හරහා පිළිකා, විකෘති දරු උපත්, හෝමෝන වෙනස් කම්, ශුක්‍රානු ගහණයේ අඩු වීම , නිසරු භාවය, එන්ඩොමෙට්‍රියෝසිස්‌ , ප්‍රතිශක්තීකරණ පද්ධතියේ බිඳ වැටීම්.
බයිෆීනොල් සහිත පොලිකාබනේට Polycarbonate, with Bisphenol A (#7)	ජලබෝතල	පිළිකා, ප්‍රතිශක්තීකරණ පද්ධතියේ බිඳ වැටීම්, නිසි කලට පෙර වැඩි විය පැමිණීම,තරබරුභාවය,දියවැඩියාව, අධික්‍රියාආරීතාව.
පොලිස්ටයිරීන් Polystyrene	අහාර බඳුන් බොහෝ වර්ග වල (මස් , මාළු, චීස්‌, යෝගට් ආදියද ඇතුළුව). රිජිෆෝම් බඳුන්,කැසට් පට ආවරණ, භාවිතයෙන් පසු ඉවතලන හැඳි ගෑරුප්පු හා කෝප්ප ආදිය, ගොඩනැගිලි පරිවරණ,ප්ලාවිත උපාංග, වෝල් ටයිල්, තීන්ත, බන්දේසි, සෙල්ලම් බඩු	ඇස් ,නාසය හා උගුරේ දැවිල්ල, කරකැවිල්ල, ශරීර මේදයේ තැන්පත් වීම, වසා ග්‍රන්ථි වල හා රුධිරාණු (ලියුකේමියාව) ආශ්‍රිත පිළිකා
පොලිඑතිලීන් Polyethelyne (#1 PET)	ජල හා සෝදා බෝතල් , බුමුතුරුණු කෙඳි, චුවින්ගම්, drinking glasses, ආහාර ඇසුරුම් හා දවටන. තාපාශ්‍රිතව මුද්‍රා තැබූ ප්ලාස්ටික් භාජන, මුළුතැන්ගේ උපකරණ, සෙල්ලම් බදු ආදිය	මානව කාසිනෝජන ඇති බවට සැක කරයි.
පොලියෙස්ටර් Polyester	මෙට්ට,ඇඟලුම්,භාවිත කර ඉවතලන ඩයපර,ආහාර ඇසුරුම්, අප්හෝල්ස්ට්‍රි	ශ්වසන මාර්ගයේ දැවිල්ල, කරප්පන්
යූරියා ෆෝමැල්ඩිහයිඩ් Urea- formaldehyde	චිප් බෝඩ්, තුනී ලෑලි,ගොඩනැගිලි ආවරණ ආදිය	මානව කාසිනෝජන ඇති බවට සැක කරන අතර විකෘති දරු උපත් වලටද හේතු විය හැක. ආශ්වාසය කැස්ස, උගුර ඉදිමීම, ඇස් වල කඳුළු පිරීම, ශ්වසන අපහසුතා, හිස රදය, කරප්පන්, වෙහෙස
පොලියුරෙතේන් ෆෝම් Polyurethane Foam	කුෂන් මෙට්ට හා කොට්ට	බ්‍රොන්කයිටිස්, ශ්වසන අපහසුතා, දෘෂ්ටි ගැටළු. බරපතල ශ්වසන රෝග ඇති කිරීමට හේතුවන ටොලුයීන් ඩිස්ඔක්සිනේට් පවා මේවායින් බාහිරයට නිදහස් විය හැක.
ඇක්‍රිලික් Acrylic	ඇඟලුම්, බ්ලැන්කට්ටු, ඇක්‍රිලික් කෙඳි වලින් නිපදවූ බුමුතුරුණු, ගම් වර්ග, සිවි කාච, දත් කුට්ටම්,බිම් ආලේප ඉටි (floor wax), ආහාර සැකසුම් උපාංග, භාවිත කර ඉවතලන ඩයපර,සනීපාරක්ෂක තුවා, තීන්ත වර්ග	ශ්වසන අපහසුතා, වමනය, පාචනය, ඔක්කාරය , දුර්වල වීම, හිස රදය,විඩාව
ටෙට්‍රාෆ්ලූරෝඑතිලීන් Tetrafluoro- ethelyne	ආහාර පිස්සෙමට ගන්නා නන්ස්ටික් භාජන වල මතු පිට ආලේපය,ඇඟලුම්, රෙදි මැදීමට ගන්න පුවරු ආවරණ, ජලනල හා උපාංග	ඇස් ,නාසය හා උගුරේ දැවිල්ල,ශ්වසන අපහසුතා

විසඳුම

මා සිතන ආකාරයට ප්ලාස්ටික් භාවිතය අවම කල යුතු බව. ඒ වෙනුවට හැකි සෑම විටම වීදුරු, මැටි භාජන අපට යොදා ගන්න පුළුවන්. ප්ලාස්ටික් භාජන/ඇසුරුම්/දවටන වල උණුසුම් ආහාර අඩංගු කිරීමත් සිදු නොකළ යුත්තක්.

අලුතින් පටන් ගත්ත මේ බ්ලොග් එක නොකඩවා පවත්වාගෙන යන්න බලාපොරොත්තු වුනත් පසු ගිය සති කිහිපයේ එහි යම් අඩාල වීමක් වුන. අන්තිම ලිපි දෙක අතර පරතරය දින 20ක්.අන්තිමම ලිපිය එතරම් දීර්ඝ නොවූවත් දින 15ක් තිස්සේ ලියූ එකක්. ඊට වඩා වැඩි කාල පරතර වලින් ලිපි පල වෙන බ්ලොග් නැතුවා නෙමෙයි.ඒත් මා සිතන්නේ අඩුම තරමේ සතියකට එකක් වත පලවන්නේනම් හොඳ බව. දඩි බිඩි ගමනක් ඕනි නැහැ. හෙමින් යමු. ඒත් ඉබි වේගෙට මම මනාප නැහැ.

පසුගිය කාලයේම මම සිටියේ දැඩි ලෙස අවිවේකීව.කොටින්ම අපේ වෙද මහත්තය වගේ vacation notice එකක් දාන්න හිටියේ.කරුණු කිහිපයක් නිසා මම අවිවේකී වුනේ.

1. ගෙදර ඉඳලම සේවය කරන්න වාසනාවක් මට ලැබිල තිබුනත් පහු ගිය කාලයේ මම කලේ ටිකක් විතර බැරෑරුම් ව්‍යාපෘතියක් නිසාත් ඒ නිසාම අනා ගැනීම් බහුල වූ නිසාත් පහුගිය කාලයේ මා ගැන මගේ සේවා ආයතනයේ ඇති වූ ප්‍රතිරූපැය එතරම් යහපත් නැහැ.ඔවුන්ගේ පැත්තෙන් එහෙම සිතීම සාධාරණයි. ඉතින් මට මේ දේවල් නිවැරදි කරගන්න (තාම වුනාද දන්නේ නැහැ) වැඩි වැඩියෙන් රාජකාරියට වෙලාව යොදන්න වුනා.

2. එළඹ ඇති ගිවිසුම් අනුව සම්පුර්ණයෙන්ම හෙළි කල නොහැකි වුනත්, ළඟදීම අන්තර්ජාලයට නිකුත් වන බහු භාෂා මෘදුකාංගයක සිංහල භාෂා වචන පිළියෙල කරදීම සිදු කරන්නේ මම. දිගු නීරස කාර්යයක් වගේම මම එය ඉක්මනින් අවසාන කල යුතුත් වෙනවා.

3. මේ මාසයේ අන්තිමට නියමිතව තිබූ අධ්‍යයන විභාගයකට සූදානම් වීමට තිබීමත් , අවසාන පැවරුම් නිම කිරීමත් අවිවේකී භාවයට තවත් හේතු වුනා.

4. ඉහත සියල්ලම තිබියදී රොසලින් උන්දෑ මාව අමාරුවේ දැමීම ඊ ළඟ හේතුව. රොසලින් කියන්නේ මගේ කුඩා දියණියගේ හිටපු ආයම්මා. මම නිවසේ සිටම වැඩ කලත්, ගුරුවරියක් වන මගේ බිරිඳට පාසල් යාමට සිදුවන නිසාත් , මගේ මවගේ සෞඛ්‍ය තත්වය එතරම් සතුටුදායක නැති නිසාත් බොහොම අමාරුවෙන් ඔය රොසලින් උන්දෑ අපි හොයා ගත්තේ.උන්දෑ කෙටි නිවාඩුවකට කියලා ගෙදර ගියා ගියාමයි තවම ආවේ නැහැ.අනුප්‍රාප්තිකයෙක් හොයා ගන්නත් තවම බැරි වුනා.ඉතින් මගේ සේවා ස්ථානයට පින් සිද්ධ වෙන්න මම උදේ ඉඳලා හවස දෙක , දෙක හමාර වෙනකම් දියණියව බලාගන්නවා.බිරිඳ ගෙදර ආවහම තමයි මම වැඩ කරන්න පටන් ගන්නේ. සාමාන්‍යයෙන් මේ දින වල මගේ වැඩ මුරය හවස 2.30 ඉඳලා අලුයම 1.30 වෙනකම්.

ඉතින් මට වෙන වැඩක කරන්න වෙලාවක් නැහැනේ. පොඩ්ඩී දවල්ට නිදා ගන්න පැයක විතර කාලයේ තමයි අමතර දෙයක් කරන්න පොඩ්ඩක් හරි ඉඩක් ලැබෙන්නේ.

මගේ ළඟ තිබුණු සොච්චමත්, පවුලේ හිතවතුන්ගේ උපකාරයෙනුත් සමස් පාඨමාලා ගාස්තු ගෙවාගත්තත් , අවසානයේදී අධ්‍යයන කටයුතු වලට මට ඉඩක් නොලැබීම මට දැඩි ප්‍රශ්නයක්. ලබන අවුරුද්දේ නැවත විභාගය කරන්න දුන්නත් , ඒකත් ප්‍රශ්නයක්නේ. කලින් පැහැදිලි කල හේතුව නිසා සේවා ස්ථානයෙන් නිවාඩු ඉල්ලීමමට මගේ පසුබෑමකුත් තිබුනා. ඉතින් අන්තිමට තිබුනේ ඔන්න ඔහේ විභාගෙට වාඩි වෙලා දන්නා දෙයක් ලියලා, නොදන්නා දේ හදලා ලියලා අඩුම තරමේ එක විෂයක් හරි යන්තමින්වත් පාස් වුනොත් ලොකු ගේමක් කියලා අන්තිමේදී හිත හදාගෙන හිටියේ.

අනේ මීට ටික මොහොතකට කලින් ඉතා මිහිරි දැන්වීමක් මම සරසවි වෙබ් අඩවියේ දැක්කා. ඒ දින නියමයක් නොමැතිව පීඨයේ සියලු විභාග කල් ගිය බව. අන්න ඒ ප්‍රීතිය නිමිත්තෙන් මම මේ සටහන තබන්නේ…ඇත්තටම මේක අනිත් අයට වැඩක් නැති දෙයක්නේ. ඒත් මට අනපේක්ෂිත සහනයක් . ඒ වගේම ඊළඟ දිනය කවදාද නොදන්නා නිසා ලැබෙන සුළු කාලය ඉතා අරපිරිමැස්මෙන් භාවිතා කරන්න වෙනවා.

කොහොම වුනත් මම අනුමාන කරනවා, මට මේ සහනය ලැබීමට හේතුව අපේ ආචාර්ය මහාචාර්ය වරුනුත්, ඔවුන්ගේ ගැටලුත් , ඇස්බී ලොක්කා ඇතුළු රජයේ හැසිරීමත් කියලා. ඉතින් මගේ හද පිරි ස්තූතිය ඒ (උත්)තමයින්ට පිරි නමනවා.

මට මේ ලැබුණු සුළු අමතර කාලය අධ්‍යයන කටයුතු වලට යොදවන නිසා මගේ ඊ ළඟ ලිපි තවත් ටිකක් ප්‍රමාද වෙයි. ඒ පිළිබඳව සමා වෙන්න.

මේ කථා බොහොමයක් මගේ කලින් රැකියාව කරන කාලයේ රෑ වැඩමුරය අවසන් වී නිවස බලා යන අතර තුර ඇසු දුටු දේවල්. බොහෝ දින වල මධ්‍යම රාත්‍රියත් පසු වී දින පතා එකම ත්‍රී රෝද රථ සංගමයක දිගු කාලීන පාරිභෝගිකයෙක් වීම නිසා මම ඔවුන් මා සමග වඩාත් හිතවත් වුනා. ඔවුන්ගේ පෞද්ගලික දේවල් පවා ඇතැම් දෙනා මා සමග කීවේ ඒ නිසා. මගේ පළමු ලිපියෙන් කිව්වා වගේ මම රත්නපුර. මගේ කලින් රැකියාව කලෙත් එහිම නිසා මේ කථා සියල්ල රත්නපුරයට අදාලයි. මෙහි එන පුද්ගල නාම සියල්ල අන්වර්ථ ඒවායි.

---

අජී අයියා හා කමල් අයියා.

මේ දෙන්නාම එක කුසේ උපන් සහෝදරයන්. ඔවුන් දෙපලම මැදි වයසේ මුල් භාගයේ. සහෝදරයන් වුනත් ඔවුන්ගේ ඇවතුම් පැවතුම් වගේම ත්‍රී රෝද රථ වලත් වෙනසක් තිබුනා.බාල සහෝදරයා කමල්, ඔහුගේ පිළිවෙලට අඳින පළදින , පිරිසුදුවට තියෙන, බැලූ බැල්මට අග හිඟ කමක් නොපෙනෙන පුද්ගලයෙක්. ඔහුගේ රථය ඉතා හොඳින් නඩත්තු කරනවා.හරියට අලුත්ම එකක් වගේ. ඒත ඔහුගේ අයියා අජී අපිරිසුදුවට සිටින මුහුණ පුරා රැවුල වවාගත් , නිතරම බීමතින් සිටින පුද්ගලයෙක්. ඔහුගේ රථය ඉතා අබලන් , නිතරම මග හිටින එකක්.

අජී අයියා හිටපු ධනවත් මැණික් ව්‍යාපාරිකයෙක්, ඒ වගේම ඔහු මගේ නිවස ආසන්නයේ සිටින අති සාර්ථක මැණික් වෙළෙන්දෙකුගේ ව්‍යාපාරික ගුරුවරයා. ගුරුවරයා මේ වන විට ත්‍රීරෝද රථයට වී හයර් එකක් ලැබෙන තුරු බලා ඉන්නවා නැතිනම් හයර් එකක් යමින් සිටිනවා විය යුතුය. ගෝලයා මේ දින වල ව්‍යාපාරික කටයුතු වලට ඇමෙරිකාවට ගිහින්. අසූ ගණන් වල මුල් හරියේ අපේ අජී අයියා මධ්‍යම පන්තියේ(පොදු මධ්‍යම පන්තිය නොවේ) මැණික් ව්‍යාපාරිකයෙක්.ඔහුම කියන ආකාරයට ඔහුට කිසිම මූල්‍ය කලමණාකාරණයක් තිබිලා නැහැ. ඔහු රත්නපුරයේ කාලයක් පැතිරිලා හිටපු තායි ව්‍යාපාරිකයින්ගේ ඇසුරට වැටීමෙන් පසු ඔහු වැඩි වැඩියෙන් විෂමාචාර වලට පෙළඹිලා තියෙනවා. තායි ජාතිකයින්ට අවශ්‍ය “බොහෝ” දේවල් සපයා දීම ඔහුගේ උප ව්‍යාපාරයක් වුනා.(ලංකාවේ පළමු ඒඩ්ස් රෝගියා රත්නපුරයෙන් බිහි කරලා දුන්නෙත් ඔය තායි බයර්ලම තමා.මාතෘකාවට අදාළ නොවුනත් කියන්න ඕනි ඒ ඒඩ්ස් රෝගියා තායි ගනුදෙනු කරුවන් හිටපු සැලුන් එහෙකට ගිය අහිංසකයෙක්.) ඒ “බොහෝ” දේ වලට ඔහුත් ඇබ්බැහි වෙලා.දිනකට ලක්ෂ ගණනින් හම්බ කලත් ඒවා වියදම් කිරීම දරුණුවටම කරලා.මේ සියල්ලත් සමගම ඔහුගේ මානයත් ඉහල ගොස් තිබුනා නිසා ඔහු විශාල නිවසක් තනවන්න පටන් ගන්නවා.වැඩ ඉවර කරන්න කලින් අතේ තිබුණු මුදල් ඉවර වීම නිසා, අනෙත් දේපල ඇපයට තබා ඔහු අධිකව ණය වුනා.ඒ කාලයේදීම ඔහුට විශාල වංචාවක් කරමින් හවුල් කාර ව්‍යාපාරික මිතුරෙක් පලා යනවා. තොණ්ඩුව බෙල්ලටම හිර වීමෙන් පසු පවුලේ ඇය බිරිඳගේ මහ ගෙදර නවත්වල ඔහු රියදුරෙක් හැටියට මැද පෙරදිග රටක රැකියාවට ගිහින් එයින් හොයපු මුදලුත් බොහොමයක් නාස්ති කරලා , වාසනාවකට වගේ ඉතුරු වුන මුදලින් පොඩි නිවසක් තනාගෙන සුළුවට නැවත මැණික් ව්‍යාපාරය පටන් ගන්නවා. අවුරුදු ගණනක ගියත් කිසිම දියුණුවක් නැති තැන ඔහු ත්‍රීරෝද රථයක මිලට ගෙන වත්මන් රක්ෂාව පටන් ගන්නවා.ඒත් සුපුරුදු පරිදි ඔහුගේ නාස්තිකාර ජීවිතය හැකි තරමින් පවත්වාගෙන ගියා. අද වෙන තුරුත් ඔහු එතනමයි. මේ වනවිට ඔහුට වැරදුන ආකාරය ඔහුගේ දරුවන්ගේ කටයුතු වලට අවශ්‍ය මුදල් ගැන , වැඩිමල් දියණියට රැකියාවක් සොයා ගැනීම වගේ දේවල් ගැන පසු තැවෙමින් ඉන්නවා.

අජී අයියාගේ මල්ලි, කමල් හිටපු පොලිස් නිලධාරියෙක්. රාජකාරියේදී දේශපාලනඥයෙකු සමග ප්‍රශ්නයක් ඇති කර ගත් ඔහු දඬුවම් මාරුව භාර නොගෙන රැකියාවට ආයුබෝවන් කියනවා.අනතුරුව පතල් රස්සාව වගේම සුළුවට මැණික් ව්‍යාපාරය කල ඔහු, ඔහුගේ ත්‍රීරෝද රථය මිල දී ගෙන අයියා ගිය මග යනවා.මත්පැන් පානය කලත් , අජී අයියා මෙන් බේබද්දෙක් නොවන ඔහුගේ අතේ දිනකට සැලකිය යුතු මුදලක් ඉතුරු වෙනවා වගේම මට හමු වන විට ඔහු ත්‍රීරෝද රථ තුනක අයිති කාරයෙක්. ත්‍රීරෝද රථ රැකියාවට අමතරව පතල් හවුල් ගෙන හිටපු නිසා වගේම වාසනාවත් නිසා මීට අවුරුදු දෙකකට විතර කලින් ඔහුට විශාල මුදලක් ලැබෙනවා.අද ඔහු සාර්ථක මැණික් ව්‍යාපාරිකයෙක් වගේම වැවිලි කරුවෙක්.

---

සමන් අයියා.

සමන් අයියා අදටත් හමුදා සෙබළෙක්. සුළු ආබාධිත තත්වයක් නිසා ඔහු සාමාන්‍ය රාජකාරි වලින් ඉවත් කරලා කුරුවිට හමුදා කඳවුරට අනියුක්තව සිටින්නේ. ඔහු ජීවත් වන්නේ රත්නපුර නගරයේම දුරාචාර වලට ප්‍රසිද්ධ කොටසක. ඒ ආසන්නයේ රජයේ නිල නිවාසයක මගේ මිතුරෙක් හිටපු නිසා වරක් දෙවරක් මමත් ඒ පරිසරයට ගොස් තිබුනා. තත්ත්වය් කොතරම් දරුණුද කියනවානම්, මිතුරාගේ නිවසේ ඉස්තොප්පුව් මේස බිමට එන ගසා, පුටු දම්වැල් වලින් ගැට ගසා, විදුලි බල්බ නොඑල්ලා වහලයටම සවි කර තිබුනේ.පාවහන් පවා ගැලවිය යුතුව තිබුනේ විසිත්ත කාමරයේ. ඉදිරි දොරෙත් වීදුරු කළු කරලා. ඒ වගේ පරිසරයක් හැදුනත් සමන් අයියාට ආදර්ශවත් චරිතයක්. බොහෝ දුරට ඒ හමුදා විනය නිසා වෙන්න ඇති. හවසට රාජකාරි නිම වී නිවසට පැමිණීමෙන් පසු පැය කිහිපයක් පවුලේ අය සමග ගතකරලා රාත්‍රී දහයට පමණ ඔහු ත්‍රීරෝද රථ නැවතුම් පලට එන්නේ.පැය කීපයක් ත්‍රීරෝද රස්සාවේ නිරත වන ඔහු පාන්දර දෙකට පමණ නිවස බලා යන්නේ නිදා ගැනීමටයි. ඔහුගේ රිය පැදවීමත් වේගවත් වගේම ප්‍රවේසම්.

---

අරුණ මල්ලී.

අරුණ කමල් අයියගේ අසල්වාසියෙක් වගේම , අරුණ පැදවූවේත් කමල් අයියාට අයත් ත්‍රීරෝද රථයක්.දැන්නම් අරුණ සරසවි අධ්‍යාපනය ලබමින් ඉන්නේ. ඒ කියන්නේ ඔහු ඒ කාලයේ ත්‍රීරෝද රථ රැකියාව කලේ උසස් පෙළ පාසැල් සිසුවෙක්ව සිටියදී. සමන් අයියා වගේම අරුණත් රථ ගාලට එන්නේ රාත්‍රියේ.පැය කීපයකින් ආපසු යනවා.නොයෙක් ආකාරයේ මිතුරන් ත්‍රීරෝද රථ ගාලේ හිටියත් අරුණ වලේ වැටුනේ නැහැ. ඔහු තමන්ගේ පවුල වෙනුවෙන් අමතර ආදායමක් සොයා ගැනීම් විතරයි කලේ. ඒ වගේම කමල් අයිය ඔහුව හොඳින් බලා ගත්තා.

---

ඉක්බාල්.

ඉක්බාල් කථා කරන්න පුළුවන් ගොලුවෙක් කිව්වොත් නිවැරදියි.ඔහු කථා කරන්නේ ගමනාන්තය දැන ගන්නත්, එවෙලේම ගාස්තු ප්‍රමාණය කීමටත් විතරයි. බැරි වීමකින් වත් අතර මගදීවත් , ගමන අවසානයේදීවත් ඔහු කතා කරන්නේ නැහැ.ඉතුරු සල්ලි දුන්නත් නිශ්ශබ්දව. ඔහු කලින් පොත් කඩයක සේවය කළා මට මතකයි.

---

බකා අයියා.

මොහුත් තරමක් නිහඬ පුද්ගලයෙක්.අනිත් අය වගේ නෙමෙයි, ඔහු මුළු දවසම වගේ ත්‍රීරෝද ගාලෙමයි ගත කරන්නේ. පසුව දැනගත් පරිදි ඔහු මගේ මිත්‍රයෙක්ගේ වැඩිමල් සහෝදරයෙක් වගේම, කාලයක් පැවිදි වී ඉඳලා තියෙනවා. ඒත් කණගාටුයි, ඔහු දැඩි බේබද්දෙක්. ඔහු සිගරට් එකක් නොබොන වේලාවක්‌ මම දැකලම නැහැ.වඩාත්ම මතක හිටින සිද්ධිය තමයි , මම මගේ කලින් රැකියාවට ගිය අන්තිම දවස අවසානයේ නිවසට ආවේ ඔහුගේ රථයෙන්. ඒ ඔවුන් සමග යන අන්තිම හයර් එක කියලා දැන ගත්තහම බකා අයියා ගොඩක් දුක් වුනා, කොතරම් දුක් වුනාද කියනවානම්, බොරුවට ත්‍රීරෝද රථය මග නතර කර, කාර්මික දෝෂයක් බව හඟවා පොඩි ආධාරයක්‌ ගන්න ඔහු උත්සාහ කළා.හොදම සිද්ධිය, බීමත්ව හිටපු ඔහු විනාඩි කිහිපයකින්, මට ඇත්තම කියා සමාව ඉල්ලීම. .

---

පිපී.

මම එක දිනක්වත් පිපී සමග ගමන් නොකළේ ,ඔහු හමු වූ මුල් දිනයේම ඔහුගේ සැබෑ චරිතය හඳුනා ගැනීම නිසා.සමහර දින වල මගේ වැඩ අවසන් වුනේ මධ්‍යම රාත්‍රියත් පහු වෙලා. එක් දිනක් ත්‍රීරෝද රථයක් ගැනීමට ගිය අවස්ථාවේ තිබුනේ එක් ත්‍රීරෝද රථයක් පමණයි. එහි සිටි කලින් නොහැඳින සිටි පුද්ගලයා පිපී. වෙනදා මගේ ගමන් ගාස්තුව රු. 250 ක් (යම් කොටසක් ආයතනයෙන් ලැබුනා ). පුරුද්දක් විදියට මම නොහඳුනන රියදුරන්ගෙන් ගාස්තුව අහාලා තමයි රථයට ගොඩ වෙන්නේ. පිපීයා මගෙන් රු. 500 ක් ඉල්ලුවා. තියෙන එකම රථය වුනත් ඒ මුදලට යන්න බැරි නිසා මම කිව්වා වෙනදා යන ගානට මිසක් යන්න බැහැ කියලා. පොරත් හෙන සද්දෙන් කිව්වා යන්න බැරිනම් තමුසේ නිකන් ඉන්නවා, මම 500 ට අඩුවෙන් යන්නේ නැහැ කියලා. එවෙලේම එතන හෝටලයේ ඉඳලා අජී අයි‍යා ආවා. අජී අයිය කතාව අහලා පිපීට බැන්නා. ඒ වෙනකොට අජී අයියාව රවටලා දන්නා හඳුනන කොල්ලන් පිරිසක් ඔහුගේ ත්‍රීරෝද රථය තාවකාලිකව පැහැරගෙන ගිහින් තිබුන නිසා ඔහුටත් මාත් එක්ක එන්න විදියක් තිබුනේ නැති නිසා නිවසට ගොස් සිටි සහෝදර රියදුරෙකුට කථා කරලා දුන්න. ඒ අතරතුරදී අජී අයියා මට අවවාද කළා පිපී සමග කවදාවත් හයර් යන්න කථා නොකරන ලෙසට.හේතුව පිපී කියන්නේ පූර්ණකාලීන පිම්පියෙක්. ඔහු ත්‍රීරෝද රථ කුලී ගමන් නොයන බවත් , මැර බලයෙන් රියදුරෙක් සේ පෙනී ඉඳිමින් රථ ගාලේ සිටත් තමන්ගේ ජාවාරම මෙහෙයවන බවත් ඉහල ගණන් කියන්නේ හයර් එක නොයන තැනට වැඩ කරන්න.ඒ වගේම් අජී තවත් හෙලිදරවට්ක් කළා, ඒ තමන්ද පාට් ටයිම් පිම්පියෙක් බව.නමුත් ඔහුට අනුව ඔහු පිම්පි සේවය ලබා දෙන්නේ කරා පොරක් ඉල්ලුවහොත් පමණයි(ලු).

---

සුරේන්.

සුරේන් සිටින්නේත් රත්නපුර නගරයේම වෙනත් ත්‍රීරෝද රථ ගාලක.මම ඉඳ හිට ඔහුත් එක්ක ගමන ගිහින් තියෙනවා.ඔහු නිතරම මත් වී සිටිනා හා සිනහ වෙන අයෙක් (හේතුව දන්නෝ දනිති).මම සිටින්නේ රත්නපුර නගරයෙන් යම් දුරකින් පිහිටි ගමක.අපේ ගමේ හිටියා දරුවන් අහිමි ඉතා මහළු යුවලක්. ඔවුන් දෙදෙනා “කුඩා” දැරිවියක් දරු කමට හදා ගත්තා. මම අවසන් වරට දකින විටත් වයස අවුරුදු 12 ක් විතර වෙන්න ඇති. සුරේන් සමග හයර් එකක් ගිය පළමු දිනයේ මගෙන් ඇහැව්වා අර දේපල හදාගත් දැරිවිය ගැන.මමත් කිව්වා , “ආ ඔවු ඒ ගොල්ලෝ පොඩි ගෑනු ළමයෙක් හදා ගන්නවනේ” කියලා.ගත් කටටම සුරේන් කිව්වේ “අන්න ඒ පොඩි ලමයව තමයි මම අරන් ගියේ කියලා”. බලන කොට මේකා අර මහළු යුවලගේ ඥාති වෙනවා, ලේ උරුමෙට දෙන්නා පැනලා ගිහින්.කොහොම හරි ඥාතීන්ගේ අභ්‍යන්තර ගැටළුව සමථ කරගෙන තිබුනේ හරි වයස ආවහම බන්දවනකම් බාලවයස්කාර දැරිය වෙනත් නිවසක නතර කිරීම.

---

---

තවත් කීප දෙනෙක් මේ අතර සිටියත් ඔවුන් සම්බන්ධ විශේෂ දේවල් මගේ මතකයේ නැහැ.ඇත්තටම් මේ බොහෝ දෙනා විෂමාචාර වලට මොන යම් ආකාරයකින් හෝ සම්බන්ධ වුනත්, (නො)හඳුනන්නන්ට වංචා කිරීමට ඇතැම් අයගේ නැඹුරුවක් තිබුනත් බොහෝ දෙනා සමස්තයක් වශයෙන් හිත හොඳ මිනිස්සු කොට්ඨාශයක්. ඇතැමුන් දවස පුරාත්, තවත් අය රෑ එළි වන තුරුත් දුක විදින්නේ තමන්ගේ ලබැඳීයන් වෙනුවෙන්.අවංකව අපේ සමස්ත සමාජය ගැන කතා කරනවානම්, ඉන් එක් කුලකයක් දින පතාම කල්ලි ගැහෙන්නේ නම ඔවුන් අතර එකිනෙකාගේ පුරුදු (අවාසනාවට බහුතරයක් අවර ගණයේ පුරුදු) සමස්තයේ අවශ්‍යතා විදිහට අනුවර්තනය වෙන ඒක පුදුමයක් නෙවෙයි.

෴෴෴

 

මේ දින වල ආන්දෝලනයට තුඩු දී තිබෙන ආසනික් ප්‍රශ්නයේ සත්‍යාසත්‍යභාවය හරියටම පැහැදිලි නොවූවද , සාමාන්‍යයෙන් ශ්‍රී ලංකාවේ සිදු වන දේවල් අනුව එය බොහෝ දුරකට සත්‍යයක් විය හැක. රජයේ පාර්ශ්වයන්ම පිල් බෙදී වෙනස් අදහස් ප්‍රකාශ කිරීමෙන් එය තවත් පැහැදිලි වේ. මෙවන් දේ කෘෂි රසායන හා පමණක් නොව අපේ ආහාර මෙන්ම ආහාර පුරුදු ආශ්‍රිතව ඍජුවම පවා සිදු නොවනවා නොවේ.මා මේ කතා කරන දේවල් විද්‍යාත්මකව ඔප්පු කිරීමට පෞද්ගලිකව කිසිම හැකියාවක් නැතත්, අපේ සංස්කෘතියට ඔබ්බවා ඇති ඇතැම් ආහාර වල පසුබිම මා දන්නා/අසා ඇති පරිදි මෙහිදී සාකච්ඡා කිරීමට තීරණය කලේ අඩුම තරමේ යම් සුළු පිරිසකට හෝ ප්‍රයෝජනයක් ලැබිය හැකි බැවිනි. එලෙසම මේ සටහන ආහාර වල භෞතික හෝ රසායනික සංයුතියන්ට අමතරව වෙනත් කරුණු කාරණාද අන්තර්ගත විය හැක.

ල_ස්ප්‍රේ කිරි බොන්නට ප්‍රිය නොවේ. ඇතැමුන්ට අප්‍රියය. පහසුවෙන් දිය නොවේ. අත්‍යාවශ්‍ය විටමින් හා ඛනිජ ලවණ අඩංගු නැතුවා විය යුතුය. නුවණක්කාරියන් ඒවා මිල දී ගන්නා බවක්ද පෙනෙන්නට නැත. කැල්සියම් ප්‍රමාණය වැඩි නැති නිසා දිගු කාලීන භාවිතය අස්ථි දිරා කැඩී වෙන් වී යාමටද හේතු විය හැක. ඒ නිසා ඇති බහුතරයක් පාරිභෝගිකයෝ ඒවා මිල දී නොගනිති. මේ ලිපිය මෙලෙසින් ලියූවද මටද ල_ස්ප්‍රේ කිරි බීම අපහසුය. මට හෝ අනිත් අයට ඒ පිළිබඳව ගැටළුවක් නැත්තේ ඉහත කී බොහෝ ගැටළු වලට විසඳුම් සමගින් තවත් බොහොමයක් කිරි පිටි වර්ග අප අතර තිබීම නිසාය.තමන් කැමති භාණ්ඩය තෝරා ගන්නට ඔබට පැහැදිලිවම අයිතියක් තිබුනද ඔබට සාම දෙයක් ගැනම විශ්වාස කල හැකිද? විසිර වියලි කිරි පිටි (Spray Dried Milk Powder) නිෂ්පාදනය කරන ක්‍රමවේදය සරලවම පැහැදිලි කරන්නේනම් ස්වභාවික කිරි යන්ත්‍රානුසාරයෙන් විසුරවන අතරතුර ජලය උණුසුම් කර වාශ්පීභවනයෙන් ඉවත් කර ශේෂය කිරිපිටි ලෙස ලබා ගැනීමයි. එය නිසි පරිදි සිදු වන්නේනම් පෝෂ්‍ය ගුණයේ අඩු වීමක් හැර වෙනත් අවැඩක් සිදු වේදැයි නොදනිමි.නමුත් කිරි පිටි සෑදීමට අමුද්‍රව්‍ය ලෙස කිරි වෙනුවට වෙනත් දෙයක් භාවිතා වනවානම් එතන පැහැදිලි ගැටළු ඇත. තවද ස්වභාවික කිරි භාවිතා නොකිරීමෙන් අහිමි වන භෞතික හා රසායනික ගති ගුණ ලබා ගැනීමට වෙනත් දේ එකතු කරනවානම් වංචාව ඉතා බරපතලය.

මා අසා ඇති ආකාරයට ලංකාවේ මිනිසුන් පිටි කිරි කියා සිතා බොන්නේ අපද්‍රව්‍යයි. නවසීලන්තයේ හෝ වෙනත් රටක හෝ කිරි හා කිරි ආශ්‍රිත වෙනත් නිෂ්පාදන කිරීමෙන් පසු ඉතිරි වන අපද්‍රව්‍යමය දියරය කිරි ලෙස අප වැනි රටවල් වලට එවන්නේ ඊනියා මානව හිතවාදී සුද්දන් විසිනි. මෙහිදී ඖෂධ මෙන්ම කිරි පිටි වෙළඳාම ද බහු ජාතික මාෆියාවක් බව මතක තබා ගත යුතුය. එකී දියරය හෝ එහි වේලු පිටි කිසි සේත්ම කිරි නොවේ. එහි ඇති යොදයක්ද නැත. කැල්සියම් හෝ වෙනත් පෝෂක ද ප්‍රමාණවත්ව නැත.එසේ හෙයින් මේ ජාවාරම් කාරයෝ එම දියරයට යොදය එක් කරති. ඒ කිරි යොදයක් නොව ඌරු තෙල් වැනි සත්ව තෙල් වර්ගය.හරියටම මතක නැතත් ලංකාවේ කිරි වල ස්ට්‍රොන්ටියම් අඩංගු බවත් ඒවා අස්ථි වල ස්ථීරව අස්ථි වල තැන්පත් වන බවත් කොතනක හෝ කියවූ බවක් මට මතකය. මෑත කාලීනව ලොව පුරා ආන්දෝලනයකට තුඩු දුන් මෙලනින් ගැටළුව මෙම කිරි ජාවාරමේ හෙළිදරවු එක් තොරතුරක් පමණි.

ලංකාවේ අපි කිරි නමින් අපද්‍රව්‍ය පානය කරනවාට අමතරව අපේ දරුවන්ටද ඒවා පොවමු. අපේ දේශීය කිරිපිටි වල තත්ත්වය හෝ නිෂ්පාදනය ඉහල නැංවීමක් සිදු කිරීමට කිසිඳු උත්සාහයක්ද නොගනිමු.කිරිපිටි පමණක් නොව යෝගට් නිෂ්පාදන බහුතරයක්ද නිපදවෙන්නේ කිලෝ පනහේ එම අපද්‍රව්‍ය පිටි දිය කල වතුරෙනි . මෙහිදී මා සලකා බැලූයේ එළකිරි සාධකය නොසලකා කිරිපිටි ගැන පමණි.

බත් හැරුණු විට අපේ තවත් එක් ප්‍රධාන ආහාරයකි, පරිප්පු. පරිප්පු ඉතා ගුණ දායකය. නමුත් ඇතැම් විට මනුෂ්‍ය පරිභෝජනයට නුසුදුසු සත්ව ආහාර පරිප්පු නමින් ආහාරයට ගන්නෙමු. කල් පිණු, දුර්වර්ණ වූ එහෙත් කෘතීම වර්ණ ගැන්වීමෙන් නිසි පැහැ ගැන්වූ පරිප්පු ද කන්නෙමු.

වෙළඳ දැන්වීම් වල උපක්‍රමශීලීව “ටින් මාළු” යැයි නිවැරදිව දැක්වූවද වර්තමානයේදී පවා බොහොමයක් දෙනා ඒවා අමතන්නේ සැමන් නමිනි. මේ නම් ව්‍යාපාරිකයා පාරිභෝගිකයාට ඇන්දවීමක් පමණක් නොව , පාරිභෝගිකයින් විසින් තමන්වම අන්දවා ගැනීමකි. ඇතැම් විට “ඉස්සර සැමන් නම් දන ඒවාට වඩා රසයි” යනුවෙන් වැඩිහිටියන් පවසනු ඔබ අසා ඇතුවා විය හැක. ඇත්තටම එදා ඔවුන් කෑවේ සැමන්ය.අද ඇත්තේ මැකරල් ය.ඒ බව ඇසුරුමෙන්ම පැහැදිලිවම පෙනී යයි. මේ දෙක එකම මාළු විශේෂයක් නොවන බව බොහෝ දෙනාට වැටහීමක් නැත. මට මැකරල් සම්බන්ධව ඇති ගැටළුවක් වන්නේ ආහාරයට සුදුසු උන්ගේ පශ්චාත් භාගය පමණමද ? යන්නයි. උන්ගේ පූර්ව භාගය මනුෂ්‍ය පරිහරණයට නුසුදුද ? එසේ නැතිනම් අපි වැනි අඩු කුලයේ ලෝක වාසීන් ඒවා කෑම නුසුදුසුද ?

ලංකාව ආශ්‍රිත ගැඹුරු මුහුදේ කෙලවල්ලෝ බහුලය. ඉන් වර්ග දෙකක් ගැන මා අසා ඇත. ඒ කළු කෙලවල්ලා හා කහ කෙලවල්ලයා. කහ කෙලවල්ලා වඩා ප්‍රණීතය.විදෙස් ඉල්ලුම මෙන්ම මිලද අධිකය. එසේ හෙයින් ලංකාවේ කහ කෙලවල්ලෝ මුහුදේදීම අපනයනය වෙති (විදෙශීයයන් මිල දී ගනිති). අපි සැමදා කළු කෙලවල්ලන් කන්නෙමු.වාසනාවකට කළු කෙලවල්ලන්ගේද කියන්නට වරදක් නැත.කෙලවල්ලන් පිළිඹදව වූ සටහනේ නිරවද්‍යතාව ගැටළු සහගත වූ නිසා තාවකාලිකව ඉවත් කරනා ලදී.

අපේ වර්ණවාහිනියේ උයන්නට කියා දෙන _යිඩ් මහතා දිනක් ගෙදරදී සොසේජස් සාදන ආකාරය කියාදෙනු මා බලා සිටියෙමි. ඒ ක්‍රමය සොසේජස් සාදන්නේනම් වරදක් නැත. නමුත් බැලූ බැල්මටම යාන්ත්‍රික සොසේජස් නිෂ්පාදනයනම් මිලේච්ඡ එකකි. ඔබලාගෙන් ඇතැම් අය මේ සම්බන්ධව එක්තරා රූපවාහිනී සටහනක දැක තිබෙනවා වෙන්නට පුළුවනි. අත්ලට ගත හැකි තරම් කුඩා ප්‍රාණී කුකුල් පැටවුන්ගේ හොට හා පා කපා දමා යාන්ත්‍ර පටිය ඔස්සේ යන්ත්‍රයට යවයි. ප්‍රතිපලය සිත්ගන්නා සුලු සොසේජස්ය.

බොහොමයක් මාංශ නිෂ්පාදන සම්බන්ධව එවැනි සදාචාරාත්මක ගැටළු බොහොමයක් ඇත. නමුත් ලංකාවේ තත්වය ඊට වෙනස්ය. ඒ ඇතැම් නිෂ්පාදකයින් සොසේජස් හා මීට් බෝල්ස් සාදන්නේ වෙනත් මාංශ නිෂ්පාදන වල අතුරු ඵල අඹරා කුඩු කර මැලියම් වලින් අලවා නිසාය.

ගුණයෙන් සපිරි යැයි කියන සෝයා මීට් නිෂ්පාදනයද (ලංකාවේදී) තරමක් දුරට ඊට සමානය. ඒ වෙනත් නිෂ්පාදන වලින් අපද්‍රව්‍ය සේ බැහැර කරන සෝයා ඇට පොතු කුඩු කොට මැලියම් වලින් අලවා නිෂ්පාදනය කරන බැවිනි.

මේ මැලියම් සමහර විට නීතියෙන් අනුමත හෝ නීතියෙන් තහනම් නොවිය හැක. එහෙත් වක්‍රාකාරයෙන් හෝ පාරිභෝගිකයා රැවටීමක් මෙහිදී සිදු නොවන්නේද ?

මස් පිණිස ඇති කරන කුකුලන්ට කෘතීම හෝමෝන අධිකව ලබා දීමත් මස් හරහා ඒවා මිනිසුන්ගේ විශේෂයෙන් කුඩා දරුවන්ගේ ශරීර ගත වන බවත් එහි ප්‍රතිඵල අඩු වයසින්ම ලැබෙන බවත් නොරහසකි.

පලතුරු සම්බන්ධ කාබයිඩ් උවදුර බොහෝ අය දනිති.පිට රටින් ගෙන්වන ඇපල්, දොඩම වැනි පලතරු මාස ගණන් නරක් නොවී පවතින්නේ මක් නිසාද?කිසිඳු පළුද්දක් නැති බැබලෙන තක්කාලි වලට කොතරම් දෙනෙක් කැමතිද ?

මත් පැන් හෝ දුම් පානය කොහොමත් ගුණ දායක නැත. අවසරලත් මත්ද්‍රව්‍ය හා සිගරැට වල ලේබලයෙන් එලියට එන නීති විරෝධී නිෂ්පාදන වල ප්‍රමාණය , සංඝටක සංයුතිය හා පැතිරීම දන්නේ දෙවියන්ම පමණි.

අපේ බත් පත ඔතන දවටනයෙන් , සිලි කවරයෙන් , ප්ලාස්ටික් බෝතලයෙන් අපේ ආහාර වලට එකතු වන්නේ මොනවාද ? පොල්තෙල් සිලි කවරයක දැමීම මොන තරම් හානිකරද? යන්න කාබනික රසායනය යන්තමින් හෝ දන්නා අයට එය තේරුම ගත හැක. පාරිසරික වශයෙන් ඉතාම දූෂිත චීනයෙන් ගෙන්වන ගුණාත්මක තත්වයෙන් අඩු පිඟන් භාණ්ඩ වල උණුසුම් ජලය හා අහාර භාවිතය (බැර ලෝහ ඇත්තෙම නැද්ද ? ) මේවා ගැන සොයන්නේ කිනම් ආයතනද ? අපි දියුණු ලෝකය කාබනික වග‍ා නිෂ්පාදන ආහාරයට පෙළඹෙද්දී දිගින් දිගටම ඔවුන්ගේ අපද්‍රව්‍ය කමින් බොමින් සිටිමු.

මේ නම ඔබට සමහර විට අසා පුරුදු ඇති. ඒ දකුණු ඇමෙරිකාව මෙන්ම ඇමෙරිකා එක්සත් ජනපදය පවා හෙල්ලූ මහා මත් ද්‍රව්‍ය ජාවාරම් කාරයෙක්. හරියටම කියනවනම් ඔහු කලේ කොකේන් ජාවාරම.ලෝකයේ එතෙක්/මෙතෙක් සිටි දරුණුම මත් ද්‍රව්‍ය ජාවාරම් කරු (හෙළි දරවු වුනු ) ඔහු. එවකට ඔහු ලෝකයේ 7 වැනි ධනවතා වුනා.

පැබ්ලෝ එමිලියෝ එස්කොබා ගැවිරියා (Pablo Emilio Escobar Gaviria) උපන්නේ 1949 දී කොලොම්බියාවේ ඇන්ටියෝකියුවා පළාතේ රියෝනීග්‍රෝ නගරයේ. දරුවන් හත් දෙනෙකු සිටි පවුලක ඔහු තුන් වැන්නා වුනා. ඔහුගේ පියාගේ රැකියාව ගැන විස්තරයක් සොයාගන්න ලැබුනේ නැහැ. ඒත් මව පෙර පාසල් ගුරුවරියක් වූ බව කියෙවෙනවා. ඔහුගේ පවුල  ඉතා  දුප්පත් එකක් වූ බවත්  මැටියෙන් තනපු කුඩා නිවසක් ජීවත්  වූ බවත් සඳහන් වෙනවා. අගහිඟකම් නිසාම පැබ්ලෝ හා සහෝදරයින් පාසලෙන් හරවා යැවූ බවත්, පසුකාලීනව ඒ අගහිඟකම් නිසාම පැබ්ලෝගේ විශ්ව විද්‍යාල  අධයාපනය ඇණ හිටීමටත් හේතු වුනා.

මෙවැනි දුෂ්කරතා හා මුහුණ දුන් අසාධාරණකම් පැබ්ලෝගේ ගමන මග වෙනස් කළා. ඔහු ඕනෑම ආකාරයකින් මුදල් සෙවීමට පෙළඹුන. ඔහුගේ මුල්ම ව්‍යාපාරය වුනේ සොරකම් කල සොහොන් ගල් වල  සටහන් මකා විකිණීම. ඉන් පසු නීති විරෝධී සිගරට් අලෙවිය , ව්‍යාජ ලොතරැයි අලෙවිය වගේම බැංකු අසල රැදී සිටිමින් මිනිසුන්ගේ මුදල්  ගරාගැනීම වගේ දේවල් වලටත් යොමුවුණා පැබ්ලෝ , වයස 20දී නම ගිය මෝටර් රථ සොරෙකු බවට පත් වනවා. 1970 මු කාලයේදී ඔහු ශරීරාරක්ෂකයෙකු (a bodyguard)  ලෙසත් කටයුතු කරනවා.

මත් ද්‍රව්‍ය ජාවාරමට එළඹීමට පළමුව ඔහු මෙඩෙලින් (Medellin) නගර පරිපාලකයෙකු පැහැරගෙන ඩොලර් ලක්ෂයක කප්පමක් ලබා ගන්නවා. සමහර විට ඒ ඔහු මත් ද්‍රව්‍ය වෙළඳාමටඅශය මූලික ප්‍රාග්ධනය සොයා ගත්තා වෙන්න පුළුවන්. ඊ ලඟට ඔහු ඇල්වාරෝ ප්‍රියේටෝ (Alvaro Prieto) නම කුප්‍රකට හොර ජාවාරම් කරු යටතේ සේවය කිරීමෙන් ධනපතියෙක් වීමේ මාර්ගය වඩාත් පැහැදිලි කර ගත්තා. වයස 22 වන විට පැබ්ලෝ කෝටිපතියෙකුව (ශ්‍රී ලංකා මුදලින්  )සිටියේ වැරදි මාර්ගයේ ගියත් ඔහුගේ දැඩි කැපවීම හා අධිෂ්ඨානය හේතුවෙන්.

පැබ්ලෝගේ සහෝදරයෙකු මෙන්ම ඔහුගේ ගිණුම් සහායක ලෙස කටයුත් කරපු රොබර්ටෝ එස්කොබා (Roberto Escobar) විසින් සඳහන් කර තිබෙන ආකාරයට දිනකට ඩොලර් බිලියන භාගයකට වඩා වටිනාකමින් යුතු වූ කොකේන්  ටොන් 15 ක්  පමණ ඇමෙරිකාවට ප්‍රවාහනය කර තිබෙනවා. ඔහුට අනුව ලැබුණු මුදල් මිටි බැඳීමට අවශ්‍ය රබර් පටි සඳහා මසකට ඔවුන් ඩොලර් 2500ක් පමණ වියදම් වූ අතර නීත්‍යානුකූලව බැංකු ගත කල නොහැකි තරම් වූ විශාල ප්‍රමාණයකින් මුදල් ලැබීම නිසා ඔවුන් මුදල් නෝට්ටු මිටි ගොඩවල් ඔවුනගේම ගබඩා වල තැන්පත් කර තිබෙනවා. එක වතාවක් විනෝද චාරිකාවක් අතර තුර තමන්ගේ දුවට උණුසුම ලබා දෙන්න ඩොලර් මිලියන 2 ක නෝට්ටු පුළුස්සන්න තරම් ඔහුට ධනය තිබුණා.

මෙඩෙලින් නගරයේ ප්‍රසිද්ධ ජාවාරම් කාරයෙකු වූ  ෆෙබියෝ රෙස්ට්‍රෙපෝ (Fabio Restrepo) ඝාතනය කරවා ඔහුගේ අනුගාමිකයන් මෙන්ම වෙළඳපොල තමන්ගේ පාලනයට ගැනීම නිසා පැබ්ලෝ තවත් ප්‍රසිද්ධියට පත් වනවා. ඔහු එසේ කිරීමට හේතුව ෆෙබියෝ, පැබ්ලෝ ඝාතනය කිරීමට කුමන්ත්‍රණය කල නිසා බව කියවෙනවා.1976 දී මත් ද්‍රව්‍ය ළඟ තබා ගැනීමේ චෝදනා මත පැබ්ලෝ හා අනුගාමිකයින් පිරිසක් අත් අඩංගුවට පත් වනවා. විනිසුරුවන්ට අල්ලස් ලබා දීමට කල අසාර්ථක උත්සාහයෙන් පසු ඔහු කලේ පොලිස් නිලධාරීන්ට අල්ලස් දී නඩුව අහෝසි වන තැනට කටයුතු කිරීමයි. ඒ සමග නීතිමය කටයුතු වලදී ඔහුගේ පිළිවෙත වූයේ අල්ලස් දීම හෝ එය අසාර්ථක නම් ඔවුන් ඝාතනය කිරීමයි.

මත් ද්‍රව්‍ය ප්‍රවාහනයට වගේම පුද්ගලික පරිහරණයට ඔහු  ජෙට් යානයක්ද ඇතුළුව ගුවන් යානා 15 ක්, හෙලිකොප්ටර් 6ක් භාවිත කල අතර ඇතැම් විට ඔහුම ඒවා පැදවූවා.පසු කාලීනව ඔහු සබ්මැරීන පවා මෙ සඳහා භාවිතා කළා. කොලොම්බියාව , පැනමාව හරහා ඔවුන්ගේ කොකේන් ප්‍රවාහනය ඇමෙරිකාවට පවා විහිදී තිබුණා. ගුවන් යානා හැසිරවීමට ඔහුගේ මන්දිරය ආසන්නයේ වෙනම පෞද්ගලික ගුවන් තොටුපලක් පවා තිබුණා. ඇමෙරිකාව තුල ඔවුන්ගේ කොකේන් වලට තිබූ ඉල්ලුම සීඝ්‍රයෙන් ඉහල ගියේ ඔහුව ලෝක ධනවතුන් අතරට ගෙනේ යමින්. ඩොලර් මිලියන කිහිපයක වියදමින් වර්ග කිලෝමීටර් 21 ක් තරම් ඉඩම් ප්‍රමාණයක් මිල දී ගන්නා ඔහු තමන්ගේ පවුලේ හා සංවිධානයේ අයවළුන්ගේ විනෝදාස්වාදය උදෙසා සත්වෝද්‍යානයක් මෙන්ම විශාල ජලාශයක් පවා ඉදි කරවනවා.

පසු කාලීනව ඔවුන් බෝලීවියාවෙන් හා පීරු රටින් කොකේන් අපනයනය පෙළඹෙන්නේ කොලොම්බියානු නිෂ්පාදනයට වඩා ඒවායේ ගුණාත්මක භාවය වැඩි වීම නිසා. පැබ්ලෝ මූලික වූ මෙඩෙලින් වෙළෙඳ සමූහයේ කොකේන් අධිරාජ්‍යය ඇමෙරිකාව, මෙක්සිකෝව, පුවටෝරිකෝව හා ඩොමිනිකානු ජනරජය දක්වා ව්‍යාප්ත වී තිබුණා. ඒ වන විට ඔවුන්ගේ ව්‍යාපාර ආසියාව දක්වා පවා පැතිරෙමින් තිබුණා.

1982 දී කොලොම්බියානු මන්ත්‍රණ සභාවට ඔහු පත් වන්නේ කොලොම්බියානු ලිබරල් පක්ෂය හරහා.එක් වරක් මැතිවරණ ව්‍යාපාරයකදී ඔහු රටේ මුළු ණය ප්‍රමාණය පෞද්ගලික මුදලින් ගෙවීමට පවා පොරොන්දු වී තිබෙනවා. රාජ්‍ය නියෝජිතයින් හා නිලධාරීන් සමග කටයුතු කිරීමේදී ඔහුගේ ප්‍රතිපත්තිය වුනේ දූෂණය හා තර්ජනය කිරීම්. කිසිවෙකුටත් ගැලවී යාමට අසීරු වූ එම ප්‍රතිපත්තිය “ප්ලාටා ඕ ප්ලෝමෝ Plata o’ Plomo” (රිදී හෝ ඊයම්) ලෙසින් හඳුන්වා දී තිබුණා. එහි අර්ථය “අල්ලස් මුදල් ලබා ගන්න (රිදී), නැත්නම් උණ්ඩයට මුහුණ දෙන්න (ඊයම්)” යන්නයි.ඔහුගේ ඝාතන ලැයිස්තුවට ජනාධිපති අපේක්ෂකයෙක්,අධිකරණ ඇමති වරයෙක් , නීතිපති වරයෙක් ,විනිසුරුවන් 200 ක්, පැහැර ගත් විරුද්ධවාදීන් 30 ක්, පොලිස් නිලධාරීන් දහස් ගණනක වගේම පසු කාලීනව දරුණු බෝම්බ පිපිරවීම් නිසා මිය ගියගිය සිවිල් ජනතාවත් අයිතියි.

කොතරම් අපරාධ කලත් ඔහු ජනතාවගේ මිතුරෙක් ව සිටියා (ඔහුට විරුද්ධ නොවන තාක්).කොලොම්බියානු රජය ඔහුට විරුද්ධ වූ විට ඇමෙරිකානුවන් සමග එක්ව පවා පැබ්ලෝ අත් අඩංගුවට ගැනීම ඉතාමත්ම අපහසු වුනේ ඒ නිසා. එම වැටලීම් උත්සාහයන් හා ඒවායෙන් ඔහු ගැලවී ගිය ආකාරය ඊ ළඟ කොටසෙන් බලා පොරොත්තු වෙන්න.

1965 දී රාජ්‍ය භාෂා දෙපාර්තමේන්තුව විසින් නිකුත් කල විශ්ව පාඨ මාලාව වෙළුම් 2ක් අද මගේ අතට ලැබුණා. නිකමට වගේ එය පෙරලා බැලූවේ ඇතැම් විට අපේ භාෂා (බක) පණ්ඩිතයින් අලුතින් හදා එක් කළ වචන ඒවායේ තිබෙන නිසා. උදාහරණයක් හැටියට Universal Joint වෙනුවට “සර්ව ලෝක පූට්ටුව”,Cashier වෙනුවට “කාසි පාලක” වගේ පද හඳුන්වා දී තිබෙන්නේ ඒ උදවියම තමා.

දෙවන වෙළුමේ 48වැනි පිටුවේ මම යම කිසි විශේෂත්වයක් දැක්කා. ඊට හේතුව එහි විශාල ඉංග්‍රීසි සංඛ්‍යා වල සිංහල නාමයන් දක්වා තිබීම. කලින් කියූ විහිළු පද වගේ නෙමෙයි, මම හිතන්නේ මේවා අපිට නිවැරදියි කියලා පිළිගන්න වෙනවා.මොකද ඒවා නව නිර්මාණ නොව පැරණි වචන නිසා. අපේ වෙද මහත්තය ළඟ සමහර විට විස්තර තියෙන්න පුළුවන් සිංහල සංඛ්‍යා පද්ධතියේ විශාලම අගය කුමක්ද කියලා. මම අහලා තියෙන විදියට බටහිර සංඛ්‍යා පද්ධතියට අපේ සංඛ්‍යා පද්ධතියේ උපරිම අන්තයට කිට්ටු වෙන්නටවත් හැකියාවක් නැහැ. ඒත් හරියටම පැහැදිලි කරන්න ඒ විස්තර මගේ ළඟ නැහැ.

කොහොම වුනත් අද ඒ සොයාගත්ත සංඛ්‍යා මම පහත දක්වනවා. ඔබට පැහැදිලිවම පේනවා මේ ලැයිස්තුව සම්පූර්ණ එකක් නෙවෙයි කියලා. ඔබලා කවුරු හරි ළග සම්පූර්ණ සංඛ්‍යා පද්ධති විස්තර තියෙනවනම් ඒවා අපි සමග බෙදා ගන්න කියන ඉල්ලීමත් මේ සමග කරනවා.

Hundred Billion – ප්‍රකෝටිය
Hundred Decillion – දස ලක්ෂ විෂ්කම්භය
Hundred Million – දස කෝටිය
Hundred Nonillion – විෂ්කම්භය
Hundred Octillion – දස ඛම්බය
Hundred Quadrillion – ලක්ෂ කෝටි ප්‍රකෝටිය
Hundred Quintillion – දස දහස් නහුතය
Hundred Septillion – සිය හුතනහුතය
Hundred Sextillion – දහස නින්නහුතය
Hundred Thousand – ලක්‍ෂය
Hundred Thousand Billion – දහස් ප්‍රකෝටිය
Hundred Thousand Million – දස දහස් කෝටිය
Hundred Thousand Nonillion – දහස් විෂ්කම්භය
Hundred Thousand Octillion – දස දහස් ඛම්බය
Hundred Thousand Quadrillion – දසනහුතය
Hundred Thousand Quintillion – නින්නහුතය
Hundred Thousand Septillion – ලක්‍ෂ හුතනහුතය
Hundred Thousand Sextillion – දස ලක්‍ෂ නින්නහුතය
Hundred Thousand Trillion – දස කෝටි ප්‍රකෝටිය
Hundred Trillion – දස ලක්‍ෂ ප්‍රකෝටිය
Billion – ලක්‍ෂ කෝටිය
Million – දස ලක්‍ෂය
Octillion – දස ලක්‍ෂ හුතනහුතය

මෙහිදී මම සංඛ්‍යා අගයන් ඉලක්කම් වලින් ඇතුලත් කරන්න උත්සාහ කලේ නෑ, මොකද සිංහල කොහොම වුනත් ඔබ සියළු දෙනාට ඉංග්‍රීසි නාමය හරහා එය සොයාගන්නට පුළුවන් නිසා.

මෙයින් අපට ඉඟියක් ලැබෙනවා නහුතය කියන්නේ ඉලක්කමක් බව. ඒ වගේම තව දෙයක්, සිංහලෙන් මේවා ලිවීමේදී සැලකිලිමත් වෙන්න ඕනි. මොකද අකුරක වෙනසකින් අසභ්‍ය (වගේ) අර්ථයක් දෙන නිසා, බලන්න හුතනහුතය ගැන. .

දැන් අපි බලමු නහුතයේ සංඛ්‍යාත්මක අගය සොයන්න.

Hundred Thousand Quadrillion කියන්නේ දසනහුතය.

Hundred Thousand Quadrillion ඉලක්කමෙන් ලියමු.

100000000000000000000

ඒ දසනහුතයනම් නහුතය ඉන් 10න් කොටසක් වෙන්න ඕනි.

ඒ කියන්නේ 10000000000000000000 , එහෙමත් නැත්නම් 10¹⁹ කියන්නේ නහුතය.

ඉතින් පොඩ්ඩක් හිතා බලන්න නහුතෙට කේන්ති යනවා කියන්නේ , ඒක මොන තරම් දරුණු වෙන්න ඕනිද ?

කලින් කිව්වා වගේ කවුරු හරි ළඟ විස්තර තියෙනවානම් අපේ සම්පූර්ණ සංඛ්‍යා පද්ධතිය එළි දක්වන්න.

෴෴෴

වෙනම ලිපියක් ඉදිරි පත් කරන්න කරුණ නැති නිසා මේ සමගම් සිංහල ඉලක්කම් වල ලැයිස්තුවකුත් ඇතුලත් කරනවා.

මේ තියෙන්නේ අපේ පැරණි සිංහල ඉලක්කම් .

1:	2:	3:	4:	5:
6:	7:	8:	9:	10:
20:	30:	40:	50:	60:
70:	80:	90:	100:	1000:

උපුටා ගැනීම : http://www.sinhala-online.com/sinhala-digits-number-page.html

ඉහත උපුටා ගැනීම මම කරපු, වෙබ් අඩවිය පවත්වාගෙන යන්නේ රෝලන්ඩ් රුස්වර්ම් (Roland Russwurm) මහතා හා ශිරානි මහත්මිය. ඉහත ඉල්ලක්කම් වලට යොදාගත් අකුරු රටා නිර්මාණය කරලා තියෙන්නේ මයිකල් එවර්සන් Michael Everson ( www.evertype.com) මහතා.අපේ භාෂාව ගවේෂණය කරන , ඒ වෙනුවෙන් විවධ නිර්මාණ, කැප කිරීම් කරන, සේවා ලබා දෙන මේ වගේ විදේශිකයන්ට අපේ කෘතඥතා පූර්වක ස්තූතිය ලබා දෙන්න ඕනි. ඒ වගේම අපේ භාෂා විද්‍යාර්ථයින් මෙවැනි දේ වලට උනන්දු නොවීම කණගාටුදායකයි. http://www.sinhala-online.com/sinhala-digits-number-page.html හි අපේ ඉංග්‍රීසි ඉලක්කම් සිංහලට හැරවීමේ මෙවලමකුත් තියෙනවා.

෴෴෴

එමවැන්නක් තිබේද ? තිබිය හැකිද ? මීට මාසයකට පමණ කලින් මාත් එවැන්නක් ගැන දැන සිටියේ නෑ. යුරෝපයේ බෞද්ධ රටක් තිබෙන්නට පුළුවන් බව කිසි සේත්ම නොසිතුවත් ඒ ගැන මට අහම්බෙන් දැන ගන්නට ලැබුණා. ඒ කැල්මිකියාවයි.

වැඩි ප්‍රසිද්ධියක් ලැබුනේ නැති වූවද, කැල්මිකියාවේ ජනාධිපති (හිටපු ජනාධිපති ද ? යන්න අපැහැදිලියි) ඉල්යුම්ෂිනොෆ් කිර්සාන් නිකොලායෙවිච් (Ilyumzhinov Kirsan Nikolayevich) පසු ගිය මාසයේදී ශ්‍රී ලංකාවේ සංචාරය කළා. එහිදී ඔහු ශ්‍රී සම්බෝධි විහාරයේ පූජ්‍ය දරණාගම කුසලධම්ම හිමියන්ගේ මූලිකත්වයෙන් පවත්වාගෙනගේ යන බෞද්ධයා (The Buddihst) නාලිකාවේ මෙහයුම් ආයතනයට ගොස් සම්මුඛ සාකච්ඡාවකට සහභාගී වී සිටින අතරතුර එම වැඩසටහන මට නැරඹීමට ලැබුණා. කැල්මිකියාව නම් බෞද්ධ රටක් යුරෝපයේ ඇති බව මා පළමු වරට දැන ගත්තේ එදා. එය කලින් පවතී රුසියානු සමූහාණ්ඩුවේ කොටසක්ව පවත පසුව ස්වයං පාලනය ලැබූ රටක්.

පහත සිතියමේ  දැක්වෙන්නේ කැල්මිකියාවයි.

මූලාශ්‍රය   Source : http://mmc-news.biz/wp-content/plugins/RSSPoster_PRO/cache/4dbe2__45840472_kalmykia226.gif

කැල්මිකියාව බෞද්ධ රටක් වීමට හේතුව  මීට වසර 400 කට පමණ ප්‍රථම එය මුලින්ම ජනාවාස කලේ මොන්ගෝලියානු බෞද්ධ පිරිසක් නිසා. ඔබලා බොහෝ දෙනෙකු දන්නා පරිදි  මොන්ගොලියානුවන් සංක්‍රමණික ජීවන රටාවකට උරුමකම් කියන පිරිසක් (Nomads).ඒ වගේම ඔවුන් අදහන්නේ ටිබේට බුද්ධාගම. ජනාධිපති කිර්සාන් පැවසූ පරිදි  සෝවියට් රුසියානු සමූහාණ්ඩු කොමියුනිස්ට් පාලනය යටතේ දශක ගණනාවක් එරට බුද්ධාගම දැඩි ලෙස යටපත් කර තිබී තියෙනවා. ප්‍රසිද්ධියේ බුද්ධාගම ඇදහීම් මරණයට පවා හේතු වූ බව කියනවා. රුසියානු සමූහාණ්ඩුවේ බිඳ වැටීමෙන් පස්සේ තම ඔවුන් ප්‍රසිද්ධියේ බුද්ධාගම අදහන්න පටන් අරන් තියෙන්නේ.මේ සඳහා ඔවුන් වෙනත් රට වල උදවු උපකාර ලබා ගෙන තියෙනවා. ඒ හැම දෙයකටම මූලික වෙලා තියෙන්නේ ජනාධිපති කිර්සාන් ගේ පාලනය.

පහත තියෙන්නේ ඔව්න්ගේ රාජ්‍ය ලාංඡනය හා ධජය. උපුටා ගැනීම විකිපීඩියාවෙන්. The source of following images is wikipedia .

කැල්මිකියාවේ අගනුවර එලිස්ටා(Elista). එලිස්ටා කැල්මිකියාවේ අගනුවර බවට පත් වන්නේ 1930 දශකයේ මුල් භාගයේදී. වාර්තා වල සඳහන් පරිදි එහි මූලාරම්භය සිදු වී තිබෙන්නේ 1865 දී. 1948දී කැල්මිකියානුවන් සයිබීරියාවට එලවා , රුසියානු ජාතිකයින් එලිස්ටා හි පදිංචි කර එහි නම ස්ටෙප්නොයි (Stepnoy) ලෙස වෙනස් කරවීමක් සිදු වී තිබෙනවා. එය නැවත එලිස්ටා යන නාමය ලබන්නේ පළවා හැරියන්ට නැවත පැමිණ එහි පදිංචි වීමට 1957 දී ඉඩ ලැබීමත් සමග. 1998දී ලෝක චෙස් ඔලිම්පියාඩ් තරඟාවලිය එහි පැවැත්වීමෙන් එලිස්ටා යම් ප්‍රසිද්ධියක් ලබාගෙන තියෙනවා.

කැල්මිකියානුවන්ගේ ප්‍රධාන භාෂාව රුසියානු භාෂාව. දෙවන භාෂාව කැල්මික් භාෂාව. පුදුමයි නේද ? ස්ව්‍යංපාලනය තිබියදී දේශීය භාෂාවට වඩා රුසියානු භාෂාව ස්වදේශිකයන් විසින්ම භාවිතා කිරීම. එයින්ම අපට සිතා ගන්නට පුළුවන් කැල්මිකියානුවන් මොනතරම් දුරට රුසියානු බලපෑමට යටත් වුනාද කියලා.

මොන ප්‍රශ්න ආවත් ඔවුන් බුද්ධාගම ඇදහීම ඇත හැරලා නෑ. මරණ බියෙන් සැඟවී හෝ ඔවුන් තමන්ගේ ආගම පවත්වා ගත්තා. ජනාධිපති කිර්සාන් කියන විදියට ඔහු කුඩා කාලයේදී , ඔහුගේ මිත්තණිය දොරවල් වසාගෙන රහසින් බුදුන් වැඳලා තියෙනවා. ඔහුට අනුව කවදා හෝ තමන්ගේ ජාතියට ආගමික නිදහස ලබා දෙන්න මැදිහත් වෙන්න බලාපොරොත්තු දීලා තියෙන්නෙත් ඒ මිත්තණියම තමා. පහත දැක්වෙන්නේ කැල්මිකියන බෞද්ධ විහාර වල ඡායාරූප.උපුටා ගැනීම විකිපීඩියාවෙන්. The source of following images is wikipedia .

තවත් එක පුදුම දෙයක් තියෙනවා. කැල්මිකියාවේ ළමුන් සියලු දෙනාම වගේ චෙස් ක්‍රීඩා කරන්න දැන සිටීම. චෙස් ක්‍රීඩාව ඔවුන්ගේ පාසැල් අධ්‍යාපනයේ අනිවාර්ය විෂයක්.ඒ නිසාම ඔවුන්ගේ අධ්‍යාපන මට්ටම දැන් ඉහල මට්ටමක තියෙනවලු. (චෙස් ගැන දන්න අය ඒක පිළි ගනීවි කියල මට හිතෙනවා). මේ තරම් චෙස් ජනප්‍රිය වීමට හේතුව ජනාධිපති කිර්සාන් ජාතික චෙස් ශූරයෙකු වීම වගේම ඔහු ලෝක චෙස් ෆෙඩරේෂනයේ සභාපති වීම.බලන්න ජනාධිපති කිර්සාන් භාවිතා කරන චෙස් ඉත්තන්ගේ ප්‍රමාණය (මූලාශ්‍රය Source of following image http://www.telegraph.co.uk/news/worldnews/europe/russia/8032904/Alien-spotting-chess-president-re-elected.html).

මේ නම් ඇත්තටම ඔහු චෙස් ෆෙඩරේෂනයේ සභාපති ධූරය ලැබීමෙන් පසු කල  සංකේතාත්මක සම්ප්‍රදායික කටයුත්තක්. කොහොමටත් සභාපතිගේ ඉත්තෝ ලොකු වෙන්න ඕනිනේ.

මේ ලිපියේදී මම කිහිප වතාවක්ම ජනාධිපති කිර්සාන් ගැන කතා කළා. මම තේරුම ගත්ත විදියට ඔහු ඒ රටට වැඩදායී නායකයෙක්.ඔහු ධන කුවේරයෙක්. ඔහු සතුව පෞද්ගලික ජෙට් යානාවක් , රෝල්ස් රොයිස් මෝටර් රථ 6 ක් හා ලිමෝසීන් රථ දෙකක්ද තියෙන බව කියවෙනවා. බෞද්ධයා නාලිකාවේ නම් ඔහුව හඳුන්වා දුන්නේ කැල්මිකියාවේ ජනාධිපති හැටියට. ඒත් විකිපීඩියා අනුව ඔහුගේ දාහත් අවුරුදු පාලනය පසු ගිය අවුරුද්දේ අවසන් වී තිබෙනවා.ඊට අනුව වත්මන් ජනාධිපති  වන්නේ ඇල්කෂෙයි මරතොවිච් ඔර්ලෝෆ් Aleksey Maratovich Orlov. ඒත් වෙනත් තැනකනම් මම ඒ ගැන සඳහනක් දැක්කේ නෑ. ඔහුගේ පාලන සමය දීර්ඝ නිසා වගේම අතරින් පතර ඔහු ඒකාධිපතියෙකු සේ දක්වා තිබීම, ඔහු පරිපූර්ණ යහපත් පාලකයෙකු නොවන/නොවූ බවට සාක්ෂි වෙන්න පුළුවන්. ඒත් බොහෝ විට දකින්නට තිබෙන්නේ ඔහුගේ හොඳ ගැන පමණයි. ඔහු ගැන හරියටම දන්නේ කැල්මිකියානුවන්ම් තමයි.

මෙන්න කැල්මිකියාවේ වීඩියෝ දර්ශන







කැල්මිකියාව ගැන තව බොහෝ දේ ලියන්න පුළුවන් . ඒත් අදට මෙතනින් නවතිනවා. බලමු අනාගතයේ කැල්මිකියාව ගැන තවත් ලිපි දෙන්න.

බොහෝ දෙනෙකු නොදන්නා නොසිතන ප්‍රදේශ වල තවත් බෞද්ධාගමිකයන් පැතිර සිටිනවා. බොහොමයක් මහායාන උදවිය. බුරියේශියාව Buriyatia (මේ බුරියන්ගේ රටද ? ), තුවා Tuva හා (ඩ්)ශබායිකල්ස්කි ක්‍රායි Zabaykalsky Krai කියන්නේ කැල්මිකියාව වගේ තවත් බෞද්ධ රුසියානු ජනපද.චීනයේ යූනාන් පළාතේ ථෙරවාද බුද්ධාගම පැතිර තිබෙනවා වගේම ඔවුන් ශ්‍රී ලංකාවට විශේෂ ගෞරවයක් දක්වනවාලු තමන්ගේ ප්‍රදේශයට බෞද්ධාගම ලබා දීම නිසා. මේ දේවල් ගැන තව සොයා බලා ඉදිරියේදී ලිපි පළ කරන්නම්.

෴෴෴

මා ලාංකීය බ්ලොග් අඩවි පරිශීලනයට පෙළඹුනේ මීට මාස කිහිපයකට කලින් මගේ මිත්‍ර , හිටපු අසල්වාසී යොහාන් විසින් මූණු පොතේ හුවමාරු කර තිබූ දුමී අයියාගේ බ්ලොග් සටහනක් නිසාය. ඊට පසු කතන්දර , ඉලෙක්ට්‍රොනික් Lab, ඇතුළු බ්ලොග් අඩවි කිහිපයකත් නිත්‍ය පරිශීලකයෙක් වුනා.මාගේ ලිවීමේ හැකියාව කෙසේ වූවත් , ඒ බ්ලොග් අඩවි හරහා මා බ්ලොග්කරණයට පිවිසීමට ඉටා ගත්තත් , එය දිනෙන් දින ප්‍රමාද වුනා.

අපේ දේශීය බ්ලොග් ප්‍රජාව ගැන දැඩි පැහැදීමක් ඇති වීමට හේතුවක් වුනේ රෝගීව හිටපු ඉලන්දාරියා වෙනුවෙන් ඔවුන්ගේ පෙළ ගැහීම හා කැප කිරීම්. ඒ අතරතුර මට බ්ලොග්කරණයට දුමී අයියාගෙන් කමෙන්ටුවක් හරහා දිරි ගැන්වීමකුත් ලැබුණා.ඒත් තවත් කාලයක් මගේ බ්ලොග්කරණයේ ආරම්භය ප්‍රමාද වුනා.

පහු ගිය සති කීපයේ මම වෙද ගෙදර මහ වෙදනගේ බ්ලොග් අඩවිය පරිශීලනයටත් පෙළඹුනා. ඊයේ ඔහු පළකර තිබූ පාතාල ලෝකෙට යන්න කැමතිද? ලිපිය දැඩි ලෙස මාගේ සිත් ගත්තා. දුමී අයියාගේ වචන වලින් කියනවානම් මගේ කට කැසීමට පටන් ගත්තා. .. මාතෘකාවෙන් තරමක් පිට , තරමක් සම්බන්ධ සාපේක්ෂව දිග කමෙන්ටුවක් මගෙන් ඒ ලිපියට (ඉඳුනිල් නමින් ) වැටෙන්නේ ඒ නිසා. එය ලිවීමේදී මාගේ බ්ලොග් අඩවිය ඉක්මනින්ම ඇරඹිය යුතු බව මට හැගී ගියා. වෙද මහතාගෙන් ඒ කමෙන්ටු වෙනුවෙන් ලැබුණු ප්‍රතිචාරය මා බ්ලොග්කරණයට කළ කල් මැරීමේ අවසානය සනිටුහන් කළා ..

මේ බ්ලොග් අඩවිය අද ඇරඹුණේ එහෙමයි.

කාලයක් තිස්සේ අපතේ යවමින් තිබූ මාගේ පුද්ගලික අඩවි නාමය (domain), ramadasa.name මේ සඳහා යොදා ගැනීම හදිසි තීරණයක්. එය මා සාමාන්‍ය වෙබ් අඩවියකට භාවිතා කරන්න තබා ගත් එකක්.ඒත් ඒ අඩවි නාමය මගේ බ්ලොග් අඩවියට අද සිට වෙන් වෙනවා. හදිසියේම ඒ වෙනුවෙන්  wordpress ස්ථාපනය කරගත්තා.
මට හිතෙන දේවල් , මගේ භාෂාවෙන් මේ බ්ලොග් අඩවියේ පළ වේවි. මා එක් ක්ෂේත්‍රයකට සීමා වීමට සිතන්නේ නැහැ. මගේ පළ කිරීම් මෝඩ ජෝක් වල සිට සංකීර්ණ කරුණු කාරණා අතර විවිධ මට්ටම් වලින් තිබේවි. අපේ හිත හොඳ බ්ලොග් සහෘදයන් පිරිස මගේ බ්ලොග් අඩවියට ලොකු ශක්තියක් වේවි.

රාමදාස කියන්නේ මගේ වාසගම. මුල් නම ඉඳුනිල් .සම වයස් මිතුරන් නම දන්නේ චීනයේ ප්‍රසිද්ධ සමාගමක නමින් .. ටික කාලයක් ගියාම ඒ නම හෙළි කරන්නම්. ගම රත්නපුරේ තියෙන ප්‍රසිද්ධ ගමක්. රැකියාව මෘදුකාංග ක්‍රමලේඛණ අංශයේ. මගේ තෙවන භාෂාව PHP…